Институти илмию тадқиқотии сайёҳӣ ва соҳибкорӣ
Scientific Research Institute of Tourism and Entrepreneurship

САҲМИ ПЕШВОИ МИЛЛАТ ДАР ТАЪСИС ВА ТАҲКИМИ ҚУВВАҲОИ МУСАЛЛАҲИ ҶУМҲУРИИ ТОҶИКИСТОН

Саҳми Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар таъсис ва ташаккули Қувваҳои Мусаллаҳи кишвар бағоят бузург ва таърихӣ мебошад. Дар шароите ки Тоҷикистон баъди ба даст овардани Истиқлоли давлатӣ ба буҳрони амиқи сиёсиву ҳарбӣ рӯ ба рӯ гардид, зарурати таъсиси неруи мудофиавии мустақил ҳамчун яке аз рукнҳои асосии давлатдорӣ ба миён омад. Маҳз дар ҳамин давраи ҳассос роҳбарияти кишвар бо сарварии Эмомалӣ Раҳмон иқдомҳои ҷиддиро барои бунёди Артиши миллӣ амалӣ намуд.
18 декабри соли 1992 бо имзои Сарвари давлат Қарор «Дар бораи таъсиси Қувваҳои Мусаллаҳи Ҷумҳурии Тоҷикистон» қабул гардид, ки заминаи ҳуқуқии таъсиси Артиши миллиро фароҳам овард. Ин иқдом дар шароити ниҳоят вазнини ҷанги шаҳрвандӣ сурат гирифт. Кишвар дорои артиши мукаммал, инфрасохтори низомӣ ва кадрҳои кофии касбӣ набуд. Бо вуҷуди ин мушкилот, Пешвои миллат масъалаи таъсиси неруҳои мусаллаҳро яке аз вазифаҳои аввалиндараҷа ва тақдирсоз арзёбӣ намуданд.
23 феврали соли 1993 дар шаҳри Душанбе нахустин гузашти ҳарбӣ баргузор гардид, ки расман рӯзи таъсисёбии Қувваҳои Мусаллаҳи Ҷумҳурии Тоҷикистон эълон шуд. Ин сана оғози марҳилаи нави давлатдории тоҷикон гардид, зеро бе неруи мудофиавии миллӣ ҳифзи истиқлолият ва тамомияти арзии кишвар ғайриимкон буд.
Саҳми Эмомалӣ Раҳмон танҳо дар таъсиси расмии Артиш маҳдуд намешавад. Ӯ аз рӯзҳои аввали роҳбарӣ ба масъалаи таҳкими иқтидори мудофиавии кишвар диққати махсус зоҳир намуда, ташкили сохторҳои идоракунӣ, таъсиси навъҳои гуногуни қӯшунҳо, омодасозии мутахассисони касбӣ ва беҳтар намудани заминаи моддиву техникиро зери назорати шахсӣ қарор доданд. Бо ташаббуси роҳбарияти кишвар мактабҳои ҳарбӣ ва муассисаҳои таълимии соҳавӣ таъсис ёфта, ҳамкориҳои низомӣ бо давлатҳои дигар густариш пайдо карданд.
Дар солҳои минбаъда бо вуҷуди мушкилоти иқтисодӣ бунёду азнавсозии қисмҳои ҳарбӣ, сохтмони биноҳои маъмурӣ, хобгоҳҳо, майдонҳои тамринӣ ва марказҳои таълимӣ ба роҳ монда шуд. Шароити иҷтимоии хизматчиёни ҳарбӣ тадриҷан беҳтар гардида, масъалаи таъминоти онҳо бо техника ва таҷҳизоти муосир дар маркази таваҷҷуҳ қарор гирифт.
Яке аз хизматҳои бузурги Пешвои миллат дар самти ҳарбӣ – барқарорсозии сулҳу ваҳдати миллӣ мебошад. Бо ба имзо расидани Созишномаи умумии истиқрори сулҳ ва ризоияти миллӣ, заминаи устувори рушди минбаъдаи Артиши миллӣ фароҳам омад. Дар фазои сулҳу субот Қувваҳои Мусаллаҳ имконият пайдо карданд, ки ба такмили омодагии ҷангӣ, баланд бардоштани сатҳи касбият ва мустаҳкам намудани интизоми ҳарбӣ диққати бештар диҳанд.
Имрӯз Артиши миллии Тоҷикистон ҳамчун неруи муташаккил ва қодир ба ҳифзи манфиатҳои миллӣ шинохта мешавад. Қисмҳои ҳарбӣ мунтазам дар машқҳои тактикӣ ва таълимоти муштарак иштирок намуда, сатҳи омодагии худро баланд мебардоранд. Ин ҳама натиҷаи сиёсати пайгирона ва таваҷҷуҳи доимии роҳбарияти олии кишвар ба масъалаҳои амният ва мудофиа мебошад.
Ҳамин тариқ, саҳми Эмомалӣ Раҳмон дар таъсис, ташаккул ва рушди Қувваҳои Мусаллаҳи Ҷумҳурии Тоҷикистон на танҳо дар қабули санадҳои муҳим, балки дар роҳнамоии мустақим, дастгирии доимӣ ва таъмини шароити мусоид барои рушду такомули Артиши миллӣ зоҳир мегардад. Артиши миллӣ имрӯз яке аз дастовардҳои муҳими даврони истиқлолият ба ҳисоб рафта, ҳамчун сипари боэътимоди давлат ва рамзи пойдории миллат хизмат мекунад.
УМАРОВ Рустамҷон Мунаҳварович
Мудири шуъбаи робитаҳои байналмилалии Институти илмию
таҳқиқотии сайёҳӣ ва соҳибкории Донишгоҳи байналмилалии
сайёҳӣ ва соҳибкории Тоҷикистон.